أحمد حلمي: «لف ودوران» نجح بالصدفة ومبحبش برامج المقالب

تحدث أحمد حلمي عن تفاصيل خاصة بحياتة الشخصية أثناء حلوله ضيفًا في برنامج carpool karaoke بالعربي، المذاع على قناة دبي، ومن تقديم وسام بريدي، كما تحدث عن عدد من نجوم الوسط الفني، ورأيه في برامج المقالب.

وقال أحمد حلمي: لا أحب المقالب بشكل عام، ولا البرامج الخاصة بها، فأنا بطبعي لا بحب أعمل مقلب في حد، ولا أقبل أشوف حد قدامي بيتعمل فيه مقلب، لأنه بصراحة بيصعب عليا.

أما عن حياته الشخصية وتعامله في المنزل مع منى وأولاده، قال: أنا ومنى لو حد من الولاد عامل حاجة بتكلم بجد وإلا هنبقى بيت فضائي، لو حد فيهم رد رد يهلك من الضحك، منبينش إننا بنضحك، كده هنبقى أب وأم هلس.

وأكد أنه يشعر بالونس عندما يكون قريبًا من عائلته، قائلًا: اللي مجربش دايمًا شايف الكلام ده وبيسمعه من برا، لما تبقى في عيلة الإحساس بيجي بجد، وحكى أن أولاده قد يعيقوا خروجه إلى مكان ما، متابعًا: ساعات ببقا خارج وولادي ييجوا فمخرجش، منى ترجع تلاقيني قاعد على الكنبة، وبقعد أقول لها العيال دي خطر، تلغي أي مشوار.

وعن زوجته منى زكي قال : لو هختار ممثل يعمل دور البطولة أمام منى زكي في فيلم قصته جاسوسية هيبقى كريم عبدالعزيز، لأن في كاريزما بينهم في التمثيل وبيعرفوا يطلعوا حاجة حلوة.

وبسؤاله عن العمل الذي قدمه ونجح «صدفة»، رد: فيلم «لف ودوران» نجح بالحب، الناس كانوا عاوزين يشوفوا حاجة من بتاعتي التقيلة، لكن لاقوه لايت لذيذ بسيط ومواقع التصوير مش كتيرة، الفيلم نجح جدا وعمل رقم كبير لإني كنت واحش الناس.