كلكم راع ….بقلم د.شيماء علام

بنت عدوانية او شلة اتفقوا على بنت وضربوها ضرب مبرح احدثوا بها عاهة مستديمة مصيبة بكل المقاييس .
لكن المصيبة الأكبر جيل كامل واقف يتفرج ويصور بالتليفون وكأنه بيشاهد فيلم ل جون سينا !!! واللى زاد الأسى والألم أن كان فى من الأولاد اللى بيضحك !!!!
هو اية اللى بيحصل ؟؟؟ للدرجة دى مبقاش فى انسانية ولا رحمة ولا شجاعة ولا مروئه ؟؟؟
كانوا بيقولوا لجحا زمان … يا حجا المسخرة فى البلاد حوالينا . رد قالهم وانا مالى طالما بعيد عن بلدى خلاص .
قالولة يا حجا المسخرة جت بلدك …. قالهم وانا مالى طالما بعيد عن قريتى خلاص .
قالوله يا حجا المسخرة جت قريتنا قالهم وانا مالى طالما بعيد عن بيتى خلاص .
قالولة يا حجا المسخرة مالية بيتك …قالهم وانا مالى طالما بعيد عنى خلاص.
انك تعيش فى مجتمع معظمة جحا ومعندهوش القدرة غير انه يكون كده مصيبة كبيرة .
لان الغلط والعيب والحرام والخير والشر مش مقياس عند جحا المقياس عند جحا ان يكون الشئ بيضر جحا أو بينفع جحا.
وده اللى حاصل عندنا حاليآ اهم مبدئين وانا مالى وانت مالك!!!
نقول بقى ثقافة غربية او قلة ايمان او انشغال الاهل بظروف الحياة قفل عليهم باب انك تكون طرف فى حوار ياخد من وقتك كام ساعة اللى هو مش مكفى احتياجاتك اصلآ !!!
ايآ كان السبب مش مبرر لان الحق حق فى ذاته والحق أولى ان يتبع .
بلاش نسيب ال nannies تربى وتزرع قيم مش بتاعتنا…. بلاش نوكل النت والموبيل وال Applications لتربية ابنائنا ….بلاش نسيب اصحابهم يربوهم …. وبلاش ننسى الهدف الاساسى اللى ربنا خلقنا علشانه اللى هو عمارة الأرض
المشكلة مشكلة جيل كامل مش بنت ضربت زميلتها خالص .
ونيجى بقى للمدرسة وقرارها بتحويل اللى صوروا الواقعة للتحقيق … ممكن يكون التصوير ممنوع داخل المدرسة أو حتى الموبيل نفسه و ممكن اكون انا نفسى ضد كل الاولاد اللى محاولتش تمنع الاشتباك او تدافع عن المجنى عليها ….لكن أنا واثقة ان اللى صور ده صور بمبدأ وهذا أضعف الإيمان.. يعنى كشف حقيقة ولولاها كان الموضوع هيخلص بنت وقعت اصطدمت بالأرض او بنتين اتخانقوا !!!
اخيرآ عاوزه اقول لكل أطراف الموضوع كلكم راع وكلكم مسئول عن راعيته.